පිරිමි දරුවා ගැහැනු දරුවෙක් වෙයි. මහ මෝදර රෝහලේ ආශ්චර්යයක්

මිනිසුන් නිරන්තරව ම අසාධාරණයට ලක්වෙති. එසේ වුව ද තමන්ට ශක්තියක් නැති නිසාත් ඇතැම් විට විවිධ බලපෑම් නිසාත් නැතිනම් ඕනෑකමක් නැති නිසාත් ඒ අසාධාරණ විඳ දරාගෙන ඔවුන්ට ඉන්නට සිදුවන අවස්ථා බොහෝ විට අසන්නට දකින්නට ලැබෙයි. මේ තවත් එවැනි අවස්ථාවකි.
අප මාධ්‍යකරුවන් ලෙස අසාධාරණයට ලක්වන්නවුන් වෙනුවෙන් පෙනී සිටීමට කොතෙක් උත්සාහ ගත්ත ද අසාධාරණයට ලක්වූ තැනැත්තාට හෝ තැනැත්තියට සාධාරණය ඉටුකැර ගැනීමට අවශ්‍ය නැත්නම් අපට ද කරන්නට දෙයක් නැත.
ඇයට අපි සුනීතා යැයි කියමු (අන්වර්ථ නාමයකි) සුනීතා ගැබ් ගත්තාය. විශේෂඥ වෛද්‍යවරු කීවේ ඇයට පුතකු ලැබීමට නියමිත බවයි. මහත් සතුටින් ඉපිළ ගිය සුනීතා හා ඇගේ සැමියා සමන් දෙදෙනාම කුළුදුල් දරුවා පුත් කුමරකු වීම ගැන මහත් උද්දාමයකින් සිටියා. දරුවා ලැබීමට ඇය මහමෝදර රෝහලට ආවේ මීට දින කිහිපයකට පෙරදීය. දරුවා ලැබිණි. හෙදියක් ඇය අසළට පැමිණ මෙන්න ඔයාට පුංචි පුතෙක් කියා දරුවා පෙන්වූවාය. පුතුගේ මුහුණ දුටු සුනීතාට තමන් විඳි වේදනා සියල්ල අමතක විය.
ඇය වාට්ටුවට ගෙන ආවාය. පුදුමයකි. ඇයගේ ඇඳට ගෙනවිත් දුන්නේ පුංචි ලදැරියකි.
‘‘ කෝ මගේ පුතා. මට ලැබුණේ දුවෙක් නෙවෙයි. “ කියමින් ඇය කෑ ගැසුවාය. වාට්ටුවේ හෙද හෙදියෝ කලබල වූහ.
හෙදියන්ගෙන් චෝදනා එල්ල වූයේ පවුල් සෞඛ්‍ය සේවිකාවන් හා සාත්තු සේවිකාවන් වෙතය. ඔවුන්ගේ වරදින් දරුවා මාරු වී ඇතැයි චෝදනා කෙරිනි. වාට්ටුවේ සේවිකාවෝ මේ ගැන වාද විවාද කරද්දී මට ඒ ගැන දැනගන්නට ලැබී එහි ගියෙමි.
ඒ යනවිට හෙදියෝ තත්ත්වය පාලනය කරගෙන තිබිණි. මව (සුනීතා) හා පියා හෙදියන්ගේ කාමරයේය. මා එහි ගොස් විනාඩි ගණනකට පසු එළියට ආ පියාගෙන් ඒ ගැන විමසුවෙමි.
‘‘ පොඩ්ඩක් ඉන්න මම කතාව කියන්නම් “ ඔහුගේ පිළිතුර විය.
විනාඩි කිහිපයකින් ඔහු යළි හෙදියන්ගේ කාමරයට ගියේය. යළි පැමිණි ඔහු මට කීවේ.
‘‘ නෑ මේක මාධ්‍යයට ප්‍රශ්නයක් නෙවෙයිනේ. අපිට ලැබුණේ දුවෙක් කියලා නර්ස්ලා කියනවා. ඒ වෙලාවේ වැරදීමක් වෙලා පුතෙක් පෙන්වා තියෙනවා. දැන් ප්‍රශ්නය විසඳිලා. ඒ නිසා මාධ්‍යයට මොනවත් කියන්න බැහැ“.
ඔහු මා සමග එවදන් පවසන විට හෙදියක් දුරකථන ඇමතුමක් ගනී. ඇගේ ඇමතුම ආරක්ෂක ප්‍රධානියාටය.
‘‘ අවසර නැතිව මීඩියා වලින් ඇවිත්, ඉක්මනට එන්න“
හෙදිය මා මාධ්‍යයෙන් යැයි දැනගත්තේ කෙසේ දැයි මා දන්නේ නැත.
මොහොතකින් මේ දරුවාගේ උපත් විස්තර වෙනත් මාර්ගයකින් පිරික්සා බැලුවෙමි.
ඉතාමත් පැහැදිලිය. උපත් විස්තරයේ ඇත්තේ පිරිමි දරුවකු උපත ලැබූ බවයි. නමුත් පසුව ඒ සියල්ල කපා දමා ගැහැනු දරුවකු බව සටහන් කර තිබේ.
මහමෝදර රෝහලේ දී උපදින පිරිමි දරුවන් ගැහැනු දරුවන් වෙන්නේත් ගැහැනු දරුවන් පිරිමි දරුවන් වෙන්නේත් ඒ ආකාරයෙනි.
සිද්ධියට තවමත් සතියක් ගතවූයේ නැත.
ඒ තාත්තාත් අම්මාත තමන් අසාධාරණයට ලක්වුව ද ඊට එරෙහිව නැගී නොසිටින්නේ නොහැකියාව නිසාද ? නැතිනම් අධිකාරීත්වයට ඇති බිය නිසාද ? නිවට කම නිසාද ? කිසිවකුගේ බලකිරීම් හේතුවෙන් ද ? වුවමනාවක් නැති නිසාද ? තමන්ට වූ අසාධාරණයේ තරම නොදන්නා නිසාද ? යන්න මා දන්නේ නැත.
ගැටළුවට මුහුණදුන් අය ඉදිරිපත් නොවන්නේ නම් අපට කරන්නට දෙයක් නැත. අවසානයේ මහමෝදර රෝහලේ ආශ්චර්යය මාධ්‍යයෙන් සැඟවී ගියේය.
අපට තේරුම් ගිය සත්‍යයනම් දරුවන් දෙදෙනකු රෝහල් සේවකයන්ගේ වරදින් මාරුවූ බවයි.